ILOILO – Hugot nga pangamuyo kag pagsalig sa Ginoo ang kapital sang Volleyball team sang Dumangas National High School agud makuha ang kadalag-an sa Iloilo Schools Sports Council Meet 2019.
Sa interview sang Bombo Radyo kay Brent Leciester, captain sang Volleyball team sang Dumangas National High School, iya ginpahayag nga ini na ang ika tatlo nga kahigayunan nga nakasulod sila sa ISSC.
Suno kay Leciester, hugot nga pangamuyo kag pagpanikasog ang ila subong nga ginasaligan agud liwat makuha ang kampeyonato sa nasambit nga hampang.
Tuman ang pagpasalamat sang natungdan sa iya nga pamilya, manunudlo kag sa tanan nga nagpalab-ot sang suporta agud nga makalab-ot ang ila team sa Integrated meet.
Nahibaluan nga ginpatigayon kahapon nga adlaw ang opening ceremony sang Iloilo School Sports Council Meet 2019 samtang magasugod naman subong nga adlaw ang pagpatigayon sang sporting events.
