ILOILO CITY- Nagnubo gid ang patubas sang mga mangunguma sa Dingle, Iloilo nga isa sa mga banwa nga apektado sang rice black bugs.
Sa interview sang Bombo Radyo kay Rene Deaño, isa ka mangunguma sa Tabugon, Dingle, Iloilo, iya ginpahayag magluwas nga gin-atake sang rice black bugs ang ila humayan, nangin problema man ang tubig sa talamnan.
Suno sa iya, kun sadto, nagalab-ot pa sa masobra 60 ka sako ang ila patubas,subong yara nalang sa 23 ka sako.
Nahibaluan nga magluwas sa Dingle, apektado man sang rice black bugs ang Calinog, Janiuay,Cabatuan,Pototan, Concepcion, kag Banate.
Padayon naman ang pagpanghatag sang Regional Crop Protection Center sang Department of Agriculture Region 6 sang abiological control agent nga ginatawag nga Metarhizium nga isa ka sahi sang fungus nga i-spray lang sa talamnan nga may tubig, kag sa sulod sang tatlo tubtob pito ka adlaw,amat- amat nga nagamasakit ang rice black bugs tubtob mapatay.
