Gin-anunsyo ni President Ferdinand Marcos, Jr. nga nagdangat sa $14.36 billion ukon ₱804.78 billion nga balor sang investments ang napirmahan kadungan sang iya state visits sa Indonesia kag Singapore.
Sa iya pag-abot sa Ninoy Aquino International Airport, ginpahayag sang presidente nga ang napirmahan nga letters of intent kag memorandums of understanding ang nagalakip sa sektor sang renewable energy, data centers, e-commerce, broadband technology, startups, government housing, kag agriculture.
Ginpahayag nga magabulig ini sa pagpabangon sang ekonomiya sang Pilipinas kag makahatag sang dugang nga trabaho sa mga Pilipino.
Ginpasalamatan man sini ang duha ka pungsod sa mainit nga pag-abi-abi sa delegasyon sang Pilipinas.
Sa Indonesia, matandaan nga nagpirma ang duha ka pungsod sang bilateral agreements lakip na ang Plan of Action sa tunga sang duha ka gobyerno halin sa 2022 tubtub sa 2027.
Sa Singapore, may mga memoranda of understanding kag agreements nga nagalakip sang kolaborasyon sang duha ka pungsod sa business opportunities para sa development sang New Clark City kag may yara man sang water collaboration.
Magluwas sa pagpakigkita sa Indonesian kag Singaporean leaders, nag-upod man si Marcos sa Filipino communities sa amo nga mga pungsod kag nagpasalamat sa ila sakripisyo kag bulig sa ekonomiya sang Pilipinas. ##
