ILOILO CITY- Nagpasalig ang Philippine Coastguard nga prayoridad nila ang paghatag sang seguridad sa mga pasahero nga nagasakay sa mga sea vessels nga nagabyahe sa Iloilo padulong sa iban nga probinsya.
Sa interview sang Bombo Radyo kay Philippine Coast Guard Iloilo Commander Paterno Belarmino Jr., iya ginpahayag nga gina-check gid sang ila officer ukon pre-departure inspection team ang kada sakayang pandagat agud masigurado nga may yara sang onboard nga life jacket, life ring kag fire extinguisher.
Suno kay Belarmino, may ginapasa man nga Mandatory Declaration of Safe Departure ang mga kapitan sang mga sea vessel.
Gina-reinspect sang mga naka on- duty nga Coast Guard personnel kun insakto ang mga nakabutang nga figures kag entries kag kun updated ang mga dokumento nga nakabutang sa Mandatory Declaration of Safe Departure.
Dugang pa niya,dapat man nga ang kadamuon sang pasahero ang nagasunod sa maximum nga kapasidad sang sakayang pandagat.
Nagpaandam man ang natungdan nga may yara sang penalidad nga idagdag kun may violation:P10,000 kun nagbyahe nga wala sang clearance halin sa Philippine Coast Guard; P50,000 kun indi makapasa sanga Mandatory Declaration of Safe Departure; kag, P50,000 kun may pagpabaya ang tag-iya kag ang kapitan sang sakayan.
Matandaan nga sang damlag lang, 27 ang patay sang naglugdang ang isa ka sakayan sa Binangonan, Rizal kun sa diin 70 ang pasahero sini apisar nga 42 lamang ang maximum capacity.
Sa nagkulob naman nga fishingboat sa kadagatan sa tunga sang Carles kag Masbate kun sa diin maswerte nga nakaluwas ang mga sakay sini, wala sang Mandatory Declaration of Safe Departure kag clearing clearance sa Philippine Coast Guard ang amo nga sakayan.
