ILOILO – Makaduha ka beses nga ginpauntat ang eleksyon sa Philippine Councilors League bangud sa kapaslawan sang voting machine.
Sa interview sang Bombo Radyo kay Philippine Councilors League – Iloilo President Ramon Sullano, iya ginpahayag nga may yara sang nagreklamo nga lain nga pangalan ang gin record sang machine ipaanggid sa iya ginboto nga kandidato.
Suno kay Sullano, 15 pa lang ka bilog nga balota gikan sa ginabanta 11,000 ang naisip sang may nagreklamo tuhoy sa kapaslawan sang makina.
Ginpauntat ang eleksyon kag na desisyonan nga ipadayon alas tres sang hapon agud makaayo ang problema sa makina.
Apang matapos ang pila ka oras, wala sa gihapon nakaayo ang problema gani gindeklarar nalang sang Department of Interior ang Local Government ang failure of election.
Gindeklarar man nga null and void ang 15 ka mga nauna nga boto kag maga sugod liwat sa umpisa ang eleksyon.
Ginpahayag ni Sullano nga antes pa man ang eleksyon kaina sang hapon sa SMX Convention Center Manila, ginakabig na nga daan nga hotly contested ang posisyon sa pagka National Chairman kun sa diin sanday Interim Danny Dayanghirang kag Jesciel Richard Salceda ang nagapapili.
Santo sa nagalapta nga flyers, si Dayanghirang nga ginapahayag may dugo nga Lambunaonon, ang suportado ni Presidente Rodrigo Duterte samtang ginapahayag nga si Salceda naman ang suportado ni anay Philippine Councilors League National President Luis ‘Chavit’ Singson.
Wala naman sang kontra si incumbent National President Jose Nelson “Tata” Sala Sr.
Sa subong, ginahulat pa nila ang memorandum sang Department of Interior and Local Government para sa panibag-o nga schedule sang eleksyon nga ginalauman nga maggwa matapos ang 30-60 ka adlaw.
