ILOILO CITY – Ginpanginwala sang Philippine National Police nga ginpaidalom sa full alert ang tanan nga units bangud sa gina-alegar nga “destabilization” plot sa military.
Suno kay Philippine National Police spokesperson Jean Fajardo, wala sang kamatuoran ang memorandum nga nagalapta sa social media nga gin-raise ang pinakataas nga alert status bangud sa issue sa Armed Forces of the Philippines headquarters sa Camp Aguinaldo.
Apang, ginpahayag ni Fajardo nga naka-heightened alert ang Philippine National Police bilang pagpanghanda sa kapistahan sang itom nga Nazareno kun sa diin, ginalauman nga linibo ka mga deboto ang magapadulong bwas, Enero 9.
Suno pa sa iya, wala sila sang may nabaton nga impormasyon may kaangtanan sa destabilization plot.
Nagdugang pa sa kahangawa sang publiko ang nakita nga mga armored vehicles sa sulod sang Philippine National Police headquarters sa Camp Crame.
Suno kay Fajardo, kabahin pa ini sang security para sa translacion.
Nahibaluan nga nagalagaw ang kopya sang police memo kun sa diin nakabutang nga ipatuman ang full alert order bangud sang resignation sang tanan nga personnel sang Department of National Defense sa Camp Aguinaldo.
Dugang pa ni Fajardo, nagmandu na sang imbestigasyon si Philippine National Police chief Rodolfo Azurin Jr. agud nga mahibaluan ang ginhalinan sang amo nga dokumento.
Una na nga ginpanginwala sang Armed Forces of the Philippines ang destabilization plot nga naglapta pagkatapos sang wala ginlauman nga pagbaylo sang pamunuan sa military.
Ginpahayag pa sang mga opisyal sang Armed Forces of the Philippines nga nagapabilin nga normal ang sitwasyon sa Camp Aguinaldo.
