Opisyal na nga gin-umpisahan liwat sang Pilipinas kag China ang negosasyon sa Chinese-funded transportation projects sa pungsod.
Sa statement sang Department of Transportation (DOTr), ginpahayag nga nagkit-anay sanday Transport Secretary Jaime Bautista kag Chinese Ambassador Huang Xilian sa Chinese Embassy sa Makati sini lang nga Agusto 11.
Suno sa DOTr, nadiskusyunan sang duha ang resumption sang negosasyon sa major China-funded railway projects kaangay sang PNR South Long Haul Project (North-South Commuter Railway), Subic-Clark Railway, kag Mindanao Railway (Tagum-Davao-Digos).
Luwas sa sini nga mga proyekto, naistoryahan man ang maritime cooperation projects, ilabi na ang hotline communication kag legal affairs cooperation arrangements sa tunga sang Philippine Coast Guard kag China Coast Guard.
Naistoryahan man ang possible collaboration sa Maritime Traffic Safety, Ferry Safety, kag paghimo sang Memorandum of Understanding (MOU) sa Maritime Search and Rescue, amo man ang capacity building para sa maritime governance, safety supervision, kag vessel safety inspection.
Ini ang latest development kasunod sang pagbawi sang Chinese government sang loan deals sang nagtakop ang termino ni anay Presidente Rodrigo Duterte.
Sa idalom sang Duterte administration, nakahulam ang Pilipinas sang kabug-usan nga $1.1-billion ukon P61.3 billion sa China. ##
