ILOILO CITY – Nagpasalig si Presidente Ferdinand Marcos, Jr. nga magapadayon ang paghaylo sang Pilipinas sa Indonesian government agud nga mahatagan sang pardon ang Filipina death row convict nga si Mary Jane Veloso.
Si Veloso ang gin-convict sang drug trafficking kag ginsentensyahan sang kamatayon sang 2015 matapos nga nakit-an ang 2. 6 kilogram sang heroin sa iya luggage sang 2010.
Ginpanginwala sini ang iya kahilabtanan sa korte kag ginpahayag nga ang luggage nga iya gingamit ang ginhatag lamang sang iya mga recruiters nga sanday Maria Cristina Sergio kag Julius Lacanilao.
Sa ginpatigayon nga three-day state visit ni Marcos sa Indonesia sang September sang nagligad nga tuig, pormal nga gin-request ni Foreign Affairs Secretary Enrique Manalo sa iya counterpart nga hatagan sang executive clemency si Veloso.
Kadungan sang pag-abot ni Marcos sa Indonesia agud nga magtambong sang 42nd Association of South East Asian Nations Summit, ginpahayag ni Marcos nga ang una nga sabat sang Indonesians, dapat nga sundon ang layi.
Apang suno kay Marcos, indi buot silingon nga natapos naman ang pag-apelar sang gobyerno.
Si Marcos ang yara subong sa Indonesia tubtob sa Mayo 11 agud nga magtambong sa pagtililipon sang Association of South East Asian Nations leaders.
