Gina-imbestigaran sang Philippine National Police (PNP) ang ginhimo sang maritime police sa Batangas kag Quezon nga pagtawag kay former Sen. Benigno “Ninoy” Aquino Jr. bilang miyembro sang New People’s Army (NPA).
Sabado sang nag-post ang Batangas Maritime Police Station kag ang Quezon Maritime Police Station sang anti-communist messages sa ila social media accounts kag naggamit sang hashtags nga “NinoyNotAHero” kag “NinoyNPA”.
Gin-post ini isa ka adlaw antes ang Ninoy Aquino Day nga isa ka official holiday sa Pilipinas agud dumdumon ang pagpatay sa anay senador.
Suno kay Police Brig. Gen. Roderick Alba, chief sang Public Information Office sang PNP, wala naga-intra ang pulis sa name calling nga magatapak sa reputasyon sang iban nga tawo bangud ginahatagan gid sang balor ang dignidad sang tawo.
Na-delete na ang nasambit nga posts apang gina-usisa suno sa PNP kun sin-o ang may kahimuan.
Kun mapamatud-an nga accountable, ipataw ang nagakaigu nga disciplinary actions. ##
