ILOILO CITY- Ginpasiguro sang Police Regional Office 6 nga wala sang may matabo nga recycling sang mga illegal drugs nga narekober sang otoridad.
Ini may kaangtanan sa pagkarekober sang malapit P5 million pesos nga illegal drugs sa sulod lang sang isa ka semana nga Birada Semana humalin sang Hulyo 10 tubtob 16 nga ginpatigayon sang Police Regional Office.
Sa interview sang Bombo Radyo kay PMaj Mary Grace Borio, spokesperson sang Police Regional Office 6, iya ginpahayag nga tanan nga drug recoveries ang ginadiretso gid sa Regional Crime Laboratory ukon sa Regional Forensic Unit para sa safekeeping.
Suno kay Borio, standard operating procedure na nga sa tion nga may makuha nga illegal drugs sa mga operasyon, kinahanglan i-turn-over ini sa nasambit nga unit sa Police Regional Office 6 sa sulod sang 24 oras.
Nahibaluan nga sa sulod lang ang isa ka semana, 65 ka mga buy bust operations ang natigayon nga nagresulta sa pagkaaresto sang 86 ka mga drug personalities kag kag pagkarekober sang 721 gramos sang illegal drugs nga nagabalor P4.9 million.
