GUIMARAS– Dako nga palamangkutanon para sa Guimaras Provincial Government kun diin makuha sang pondo agud igasto sa pag-ilis sang desinyo sang mga pump boat nga nagabiyahe Iloilo-Guimaras vice versa.
Sa interview sang Bombo Radyo kay Governor Samuel Gumarin, iya ginpahayag nga ginpakita sang Maritime Industry Authority ang mga bag-o nga disenyo sang pump boat sa ginpatigayon nga pagsinapol.
Suno kay Gumarin, ginapaligban nila subong ilabi na sang operators kun sa diin magakuha sang pondo agud ilisan ang disenyo sang pump boat.
Magluwas sa disenyo nga ginpakita sang Maritime Industry Authority, luyag man sang mga operator suno kay Gumarin nga ipakita man ang ila kaugalingon nga disenyo agud sila mismo ang makabanta sang balor sini.
Sa subong suno kay Gumarin, gina-umpisahan na nila ang pagpangita sang pamaagi agud nga mahatagan sang subsidy ang mga operator.
