ILOILO CITY- Sa masunod nga tuig pa makaayo ang porsyon sang dalan sa idalom sang Buhang flyover, sa Buhang, Jaro, Iloilo City.
Ginareklamo sang mga motorista ang amo nga dalan bangud wala ini nakonkreto rason nga nagatap-ok ang yab-ok kun nagalabay ang mga salakyan.
Sa interview sang Bombo Radyo kay Engineer Eduard Sudario, Chief sang Construction Division sang Iloilo City District Engineering Office, iya ginpahayag nga, pangitaan pa sang budget ang pagpasemento sang dalan kag may proposal man para sa road widening agud indi maggutok ang mga salakyan nga nagalabay sa lugar.
Suno kay Sudario, samtang wala pa sang budget, tinguhaan sang maintenance division sang ila opisina nga mapabilin nga wala sang luhob-luhob agud indi man mabudlayan ang mga motorista.
