Nagbalik na sa normal ang air traffic sa Ninoy Aquino International Airport (NAIA) kasunod sang technical issues nga naeksperyensyahan sa mismo Bag-ong Tuig.
Sa statement sang Department of Transportation (DOTr), ginpahayag nga nag-resume ang airport operations ‘partially’ sang ‘las kuatro sang hapon, kag nagsugod naman sa 5:50 pm ang pagbalik sang normal operations.
Ang una nga flight nga nag-land sa airport matapos ang anum ka oras nga delay amo ang flight gikan sa Brisbane, Australia; samtang ang una naman nga flight halin sa NAIA amo ang padulong sa Hong Kong nga naka-eksperyensya sang pito ka oras kag tunga nga delay bangud sa technical issue.
Ang delays sa NAIA ang tuga sang “technical issues” sa air navigation facilities sang Civil Aviation Authority of the Philippines (CAAP).
Ginpahayag nga apektado ang 282 ka mga byahe nga pakadto kag pahalin sa Manila, kag majority sa sini ang ginkanselar sandig sa lista sang Manila International Airport Airport Authority. Masobra 65,000 ka mga pasahero ang na-stranded bangud sini suno kay Transportation Secretary Jaime Bautista.
Suno sa flight tracker nga Flightradar24.com, wala gid sang nakit-an nga flights sa Philippine airspace sa anuman nga oras sang adlaw kahapon.
Sa Iloilo International Airport, apektado man ang 20 ka flights nga ginabug-usan sang 2,703 ka mga pasahero.
Nagpangayo naman sang pasaylo ang CAAP kag nagpaathag nga isa sa uninterruptible power supplies ang nag-fail sang Domingo sang aga kag kinahanglan ang troubleshooting.
Sang na-connect na liwat ang system sa power supply, may warnings naman nga ginpaguwa sang udto bangud sa over voltage bangud 380 volts ang nagaguwa sa baylo nga 220 volts.
Bangud sini, naapektuhan na naman ang very small aperture terminal, kag kinahanglan naman nga kay-uhon.
Ginalauman sang transport officials nga maka-‘fully recover’ ang flight operations sa sulod sang tatlo ka adlaw.
Kinahanglan suno sa ahensya ang binilyon ka pesos para sa upgrade sa talatapan.
Ginpasalig pa ni CAAP Director General Manuel Tamayo nga pirmehon ang monitoring sang system.
Daily basis man suno sa iya ang pag-monitor sini kag ini ang una nga tion nga natabo ang insidente matapos nabakal ang system sang 2018.
Ginpahayag man sang DOTr Secretary nga nakahibalo si President Ferdinand “Bongbong” Marcos Jr. sang natabo nga sitwasyon kag nakahibalo man ini nga importante ang deadlines sa pag-upgrade sang system. ##
