ILOILO CITY – Nagkitaay sanday President Ferdinand Marcos Jr. kay United States President Joe Biden kadungan sang pagpadulong sang presidente sa New York City para sa 77th United Nations General Assembly.
Una na nga ginpahayag sang isa ka senior White House official nga ang duha ka mga lider ang ginalauman nga maga-discuss may kaangtanan sa global economy kag paano ini naka-apekto sa Pilipinas; ang West Philippine Sea; ang security relationship sa tunga sang Estados Unidos kag Pilipinas; kag ang kabug-usan nga kalaparon sang isyu sa alliance.
Suno kay Marcos, ang masobra sa 100 ka tuig nga relasyon sa tunga sang Pilipinas kag Estados Unidos ang magapadayon sa pag-evolve samtang nga may ginapangatubang nga mga pagtilaw sa sini nga bag-o nga century kag pag-maintain sang kalinong apisar sang tanan nga kumplikasyon nga nagtuhaw sa nagliligad nga mga binulan.
Nagpasalamat man ini kay Biden sa pagpakigkita sa iya.
Ginpasalig niya nga magapadayon nga mangin kaalyado, partner kag abyan sang Pilipinas ang Estados Unidos.
Suno naman kay United States President Joe Biden, gusto niya nga hambalan ang nahanungod sa West Philippine Sea kun sa diin, gina-exert sang China ang ila impluwensya subong man ang coronavirus disease kag renewable energy.
Ginpasalamatan man sini si Marcos sa pagkontra sa gintuga nga gamo sang Russia sa Ukraine.
Nahibaluan nga ang Pilipinas ang isa ka key ally sang Estados Unidos kag maayo nga pwesto sa tion nga kinahanglan sang Amerika nga depensahan ang Taiwan batuk sa pagpang-atake sang China bangud sa geographical position sini.
Antes sini, una na nga nagpatigayon sang bilateral meeting si Marcos kay Japanese Prime Minister Fumio Kishida kun sa diin, ginhambalan sang duha ang pagpabaskog pa sang kooperasyon sa priority areas para sa iya administrasyon kaangay sang agrikultura, enerhiya, ikaayong lawas kag imprastraktura.
Kadungan man sang bilateral meeting, ginpahayag ni Kishida nga ang kinahanglan nga magkontra sang international community sa unilateral attempts nga islan ang status quo pinaagi sa paggamit sang pwersa sa East kag West Philippine Sea kag subong man sa economic coercion.
