ILOILO CITY – Nagpasalig si President Ferdinand “Bongbong” Marcos Jr. nga may bastante pa nga buffer stock sang bugas apisar sang tuman ka dako nga kahalitan sa agrikultura ang ginbilin ni Super Typhoon Egay sa Northern Luzon.
Ginsapol ni Marcos ang mga opisyal sang Department of Agriculture agud nga hambalan ang epekto ni Egay sa rice production sang pungsod kag ang mga tikang agud nga masiguro nga bastante ang suplay sang bugas.
Suno kay Marcos, ginpasalig siya sang mga opisyal sang Department of Agriculture nga bastante ang suplay sang binhi sang humay kag mais kag sang mga high-value crops nga ipanagtag sa mga apektado nga mangunguma.
Ang ahensya ang magapanagtag sang 111,873 bags sang binhi sang humay; 14,426 bags sang corn seeds; kag 2,582 kilograms sang nagkalain-lain nga binhi sang utan sa mga rehiyon nga apektado sang Egay.
Ginpakigbahin man ni Marcos nga na-istoryahan man ang pagpanghanda sang Department of Agriculture para sa buffer stock nga kabahin sang mga tikang agud nga ma-address ang ginalauman nga epekto sang El Niño phenomenon.
Pahayag niya, kinahanglan nga mag-import sang humay sa tion sang emerhensya apang dapat ini nga tun-an sang maayo.
Una na nga ginpahayag sang ahensya nga nagaplano sila nga mag-import sang 1.3 million metric tons sang bugas.
