ILOILO CITY – Ginpalawig pa ni Presidente Ferdinand Marcos, Jr. ang temporary modification sang rates of import duty sa nagkalain-lain nga produkto agud nga mapabilin ang kasarangan nga presyo kag masiguro ang suplay sang agricultural products.
Sang Disyember 29 sang nagligad nga tuig, ginpirmahan ni Marcos ang Executive Order (EO) No. 10 kun sa diin, nakasaad diri nga ang karne sang baboy, fresh, chilled ukon frozen, ang mais, humay, kag coal ang dapat i-subject sa Most Favored Nation rates of duty.
Sa amo man nga executive order, ang nagalala pa nga inflation nga tuga sang kakulang sang suplay, ang ginapanana-aw nga kakulang sa global supply kag pagsaka sang international commodity prices ang nagaresulta sa ekonomiya kag trade sang pungsod.
Samtang, ang tarrif rates sa coal ang dapat nga ipaidalom sa semestral review pagkatapos sang December 31, 2023.
Ginamanduan man sang executive order ang National Economic and Development Authority Committee on Tariff and Related Matters nga magpasa sa presidente pinaagi sa Office of the Executive Secretary sang findings kag recommendations lakip na ang analysis kag monitoring sa coal market.
