MALACAÑANG – Ginbaton na ni Presidente Rodrigo Duterte ang ‘apology’ ni ABS-CBN President/CEO Carlo Katigbak sa kapaslawan nga nahimo sang ila nga network kag nakasakit sa balatyagon sang Presidente.
Wala naman ginbaton ni Presidente Duterte ang gintanyag nga refund sang ABS-CBN para sa iya unaired political advertisements sang nakaligad nga eleksyon.
Suno sa presidente mas maayo kun ihatag nalang nila ini sa isa ka charitable institution.
Ini matapos nga gin-ako ni ABS-CBN President and CEO Carlo Katigbak sa ginpatigayon nga Senate Panel Inquiry may kaangtanan sa prangkisa sang network nga matuod nga napaslawan sila nga i-palayag ang ginabanta P7milyon nga local ad nga ginbaydan ni anay sadto presidential candidate Rodrigo Duterte.
Gin-athag ni Katigbak nga na air nila tanan nga national political ads ni Presidente Duterte sang 2016 elections apang ang iya nga ad nga nagabalor P7 milyon ang wala na naakomodar bangud sa first come, first served policy.
May kaangtanan naman sa prangkisa sang ABS-CBN, ginpahayag ni Presidente Duterte nga ginatugyan na niya ini sa Kongreso bangud katungdanan na ini sang mga mamalidha.
Suno kay Presidente Duterte, trabaho na ini sang Kamara bangud nagakadapat nga sa ila maghalin ang franchise bill antes ipasaka sa Senado.
Dugang pa sang natungdan, wala siya sang gintawgan nga kongresista agud ipauntat ang prangkisa sang network.
Santo sa pahayag sang natungdan, sa tion nga mapatud-an nga may yara siya sang gintawgan nga kongresista gilayon siya nga magabiya sa iya nga posisyon.
Kadungan sini, ginpahayag ni Presidente Duterte nga indi mahimo nga mapunggan niya si Solicitor General Jose Calida sa pagpasaka niya sang qou warranto petition batok sa ABS-CBN.
Ini bangud Independent ang SolGen gani indi niya madiktahan si Calida kun ano ang nagakadapat niya nga ghimuon
