ILOILO CITY – Magapatuman sang border restriction ang probinsya sang Antique bangud sa pagpamahog sang Coronavirus Disease 2019.
Sa interview sang Bombo Radyo kay Antique Governor Rhodora Cadiao, iya ginpahayag nga madamo sang nag abot nga Antiqueño nga nagikan sa Metro Manila matapos nga gin-anunsyar ni Presidente Rodrigo Duterte ang pagpatuman sang community quarantine sa nasambit nga lugar.
Gani gilayon nila nga ginpasarado ang mga entrance kag exits sa naaminhan kag nabagatnan nga bahin sang Antique.
Ini agud nga malikawan nga magkagwa pa ang mga nagikan sa Metro Manila nga posible halinan sang virus.
Suno kay Cadiao, ang ginpatuman nila nga border restrictions ang magalimita sa pagsulod kag paggwa sang mga tawo sa probinsya sang Antique.
Dugang sang natungdan, indi nila luyag nga sa ila probinsya maghalin ang magadala sang virus sa bilog nga isla sang Panay gani temprano palang ginlimitahan na nila ang hulag kag pagbyahe sang mga tawo.
Santo sa pahayag sang gobernador, ginpanugyanan naman nila ang mga pumuluyo nga may patigayunon nga transakyon sa syudad sang Iloilo ukon sa iban pa nga bahin sang Panay nga tapuson na ini sa lunes palang bangud mangin epektibo ang boarder restricion sa Martes, Marso 17 kag magalawig sang 14 ka adlaw.
