Apat ka adlaw matapos nasapwan ang bangkay ni Claire Diergos sa sulod sang iya salakyan sa Barangay Inangayan, Sta. Barbara, Iloilo, nagpasalig ang mga pulis nga ihatag gid ang nagakaigu nga hustiya kag ipasaka ang kaso-kriminal sa posible indi lang isa kundi madamo nga mga suspek.
“May kakayahan, may idea, kag may ikasangkol ang mga naghimo sini,” suno kay Police Major Raymond Celoso, hepe sang Sta. Barbara Municipal Police Station. Brutal ang pagpatay sa biktima, kag nagapabilin nga anggulo nga utang nga kwarta, pagpangawat, pagpangimon, kag hatred ukon tuman nga kaakig ang mga anggulo nga ginasundan sang Special Investigation Team.
“Ako nagapati ako nga indi ini ma-commit sang isa lang kundi masobra sa isa ang nakahimo sini,” suno kay Celoso. Professional killer ayhan? “May probability,” sabat sang hepe.
Nagpangayo sang paghangop ang hepe bangud sa mga gina-withold nga impormasyon angot sa imbestigasyonn, apang suno kay Celoso: “Ang hustiya ginapasalig namon sa pamilya nga ihatag sang aton nga mga pulis. Ini nga insidente gina-assure gid naton nga nga i-file naton ang kaso batok sa naghimo/mga naghimo sini.”
Si Rodelym Sumbong, kabulig sa balay kag amo lang ang nagaisahanon nga kaupod ni Claire kag sang iya three-year old baby sa Deca Homes Subdivision, ang hugot man nga naga-cooperate sa imbestigasyon suno sa hepe. ##
