ILOILO CITY – Nagpasalig ang Iloilo City Police Office (ICPO) nga manabat ang pulis nga gina-alegar asud-asud nga nagpagpalupok sang iya armas sa Brgy Balibagan Oeste, Sta Barbara, Iloilo sang Pebrero 16.
Ang nasambit nga pulis amo si PCpl Rolando Lozada Jr., 33 anyos, residente sang Brgy. Zamora Melliza, Iloilo City Proper, kag nadesignar sa Iloilo City Mobile Group.
Sa interview sang Bombo Radyo kay PCapt Shella Mae Sangrines, tagpamaba sang ICPO, iya ginpahayag nga wala gina-tolerar sang nasambit nga pamunuan kun may malain nga ginahimo ang ila personnel.
Suno pa kay Sangrines, indi na magpakigbahin sa kaso ang ICPO apang respetuhon nila ang mangin resulta sang imbestigasyon sang Provincial Internal Affairs Service (PIAS) sang Iloilo Provincial Police Office (IPPO).
Pahayag sang opisyal, wala pa nakabaton ang ICPO sang official copy sang reklamo sang punong barangay sang Brgy Balibagan Oeste, Sta Barbara, Iloilo kag ginahulat pa nila ang affidavit sang nasambit nga pulis.
Dugang pa ni Sangrines, kaangot sa mandu ni newly-designated ICPO Director Pol. Col. Eric Dampal, dapat ipatuman ang internal cleansing sa diin lauman nga magapangatubang sang nagakaigu nga kaso ang pulis kun mapamatud-an nga may sala ini.
Sa subong, naga-duty sa gihapon si Lozada samtang wala pa naka-gwa ang resulta sang imbestigasyon.
