ILOILO CITY – Wala nagapakita sang iya presensya si Punong Barangay Cesar Espinosa apisar sang tuman kadamo nga reklamo sang mga pumuluyo sa Brgy. Sto. Niño Sur, Arevalo, Iloilo City nga apektado sang extreme enhanced community quaratine.
Ini ang alegasyon sang pila ka mga pumuluyo magluwas pa sa reklamo sang mahinay nga pagpanagtag sang food packs.
Sa interview sang Bombo Radyo kay Weena Alsol, residente sang nasambit nga barangay, iya ginpahayag nga tuman kadaku nga problema ang ginapangatubang sang ila lugar kag ang importante subong amo ang impormasyon nagikan sa mga opisyal.
Gin-athag ni Alsol nga wala niya ginakontra si Espinosa apang indi na lahog-lahog ang sitwasyon sa subong sa diin ginapahayag nga “may diskriminasyon” sila nga mabatyagan gikan sa iban nga tawo sa tion nga mahibaluan sang iban nga sila ang residente sang Brgy. Sto. Niño Sur.
Suno kay Alsol, indi man makamato-mato ang mga barangay kagawad kag barangay tanod sa paghatag sang abiso sa mga residente sa lugar bangud ang punong barangay amo ang amay sang mga pumuluyo nga dapat magpanguna sa tanan nga lihok.
Pahayag ni Alsol, kun indi man makahambal sang personal si Espinosa, nagalaum sila nga magahatag ini sang announcement sa radyo.
Nahibaluan nga subong nga adlaw, Mayo 8, ang katapusan nga adlaw sang pagpatuman sang extreme enhanced community quaratine matapos ma-record ang anum ka kaso sang Coronavirus Disease 2019 (COVID-19) kag kumpirmado nga local transmission.
Ginatinguhaan sang Bombo News Team nga makuhaan sang pahayag si Espinosa may kaangtanan diri.
