Nagalaum ang punong barangay sang Tacas, Jaro, Iloilo City nga mapadayon kag matapos ang pag-trabaho sa flood mitigation project sa ila nga barangay.
Ini nga proyekto ang sa idalom sang Iloilo City District Engineering Office kag gina-obra sang kontraktor nga Alpha and Omega General Contractor and Development Corporation.
Sa interview sang Bombo Radyo kay Punong Barangay Joseph Poral, iya ginpahayag nga temporaryo anay nga nag-untat ang konstruksyon sang proyekto kag ginsiling sang mga trabahahor nga nagahulat sila sang mandu nga magpadayon.
Pahayag ni Poral, importante gid para sa ila flood control project para nga maprotektahan sila sa baha kun magbubo ang mamunog nga ulan kag kun mag-bagyo.
“Kun indi mapadayon obra [maapektuhan gid kami.] Halimbawa, kun magkipot ang suba, ang flow sang tubig halin sa babaw pakadto diri sa Tacas, Jaro palusot sa Balabago, maninit ang tubig sa paguwa kag may tendency nga magbaha,” suno sa barangay official.
Nahibaluan nga ini nga proyekto ang isa sa natukiban sang Iloilo City Government nga wala sang mayor’s permit.
Ang kontraktor ang isa man sa siyam ka construction companies nga ginapanag-iyahan sang mga Discaya nga ang lisensya gin-revoke sang Philippine Contractors Accreditation Board (PCAB).#
