ILOILO CITY- Nagpangayo sang paghangop ang punong barangay sang Sinikway, Lapuz, Iloilo City sa mga pumuluyo bangud sa naeksperyensiyahan nga pagbaha sa ila lugar kadungan sang pagbubo sang ulan subong nga adlaw.
Sa interview sang Bombo Radyo ky Punong Barangay Corazon Coo, iya ginpahayag nga wala pa napatuman ang drainage project sa lugar rason nga wala pa sang iligan ang tubig.
Suno kay Coo, gin-una anay ang pagpakay-o sang karsada antes ang pag-construct sang drainage kag pagpahimo sang kanal.
Apang suno sa punong barangay, sa masunod nga semana umpisahan ang paghimo sang kanal kag sa masunod ngaa bulan naman ang construction sang drainage.
Nagalaum ang natungdan nga sa tion nga matapos ang nasambit nga mga proyekto,mahagan-hagan na ang problema sa baha kun mag-ulan.
Nagpangabay man ini sa mga pumuluyo nga mangin responsable man sa ila mga basura bangud isa man ini sa nagapanguna nga rason sang pagbaha bangud nagasupon ang mga basura sa alagyan sang tubig.
