ILOILO – Liwat nga ginkwestiyon ni Iloilo Vice Governor Christine “Tingting” Garin ang kalidad sang road signs sa probinsya sang Iloilo.
Sa isa ka pagsinapol kaupod ang Department of Public Works and Highways (DPWH), ginpamangkot ni Garin kon bala reflectorized ang mga paandam nga nakapaskil sa dalan agud makit-an sang mga motorista sa kagab-ihon.
Ginpamangkot man ni Garin kon bala may mga suga nga nakabutang mga dalan nga under construction pa agud malikawan ang aksidente.
Liwat nga ginbase ni Garin ang sitwasyon sa data sang Iloilo Police Provincial Office (IPPO), sa diin narekord ang 485 cases humalin sang Enero 2019 tubtob subong may kaangtanan sa mga aksidente sa dalanon bangud wala sang early warning device.
Mas maayo suno kay Garin nga may yara sang specific design, size, kag measurement nga mahatag ang DPWH agud mapatpat ini sa mga kontraktor.
Kaangot naman sa reponsibilidad sang kontraktor, nagalaum si Garin nga may yara man sang nagakaigu kag mas hugot nga polisiya ang ahensya agud nga mahimo sang mga ini ang ila obligasyon sa pagbutang sang suga kag early warning device.
SABAT SANG DPWH.
Ipalab-ot kay DPWH Regional Director Lea Delfinado ang tanan nga suhestiyon nagikan sa Iloilo Provincial Government.
Ini ang ginpasalig ni Engr. Ormel Santos, assistant chief sang construction division sang amo nga pamunuan, bilang sabat sa mga pamangkot ni Garin.
Aminado si Santos nga indi pa reflectorized ang tanan nga mga road signs, kag wala man sang suga ang pipila ka mga construction sites.
Ginpahayag ni Santos nga ini ang bangud sa kakulang man sang compliance sang mga contractor.
Kaangot sa mga regulasyon kag mga pwede mahimo sang DPWH sa sini mga problema, suno kay Santos, igapahayag niya sa regional director nga istrikto nga i-monitor ang pagsunod sang publiko kag sang mga contractor.
