ILOILO CITY – Indi pa makabig nga pugante si Negros Oriental 3rd District Representative Arnulfo “Arnie” Teves, Jr.
Sa interview sang Bombo Radyo kay Atty. Noel Palomado, Bombo Abogado, iya ginpahayag nga wala pa sang standing warrant of arrest si Teves gani wala pa sang basehan agud nga makabig ini nga pugante.
Pahayag ni Palomado, ang sampaw-sampaw nga kaso nga ginpasaka batuk kay Teves bangud sang serye sang pagpamatay sang 2019 ang yara pa lamang sa piskalya.
Sa ginbuyagyag naman sang isa sa mga suspek sa pagpatay kay Negros Oriental Governor Roel Degamo nga ang mastermind amo si Teves, pahayag ni Palomado, wala pa sang may naggwa nga warrant of arrest.
Wala pa man sang warrant of arrest kay Teves sa ginpatigayon nga raid sang otoridad sa pila niya ka balay kag propyedad sa Negros Oriental.
Ang ini nga mga kaso ang ipaidalom pa sa preliminary investigation suno kay Palomado.
Sa tion nga magpauli si Teves sa Pilipinas, wala sang basehan ang mga otoridad nga dakpon ini.
Nahibaluan nga tubtob subong nga adlaw, wala pa nakapauli sa Pilipinas ang kongresista.
Una na nga ginpahayag ni Justice Secretary Jesus Crispin Remulla nga nakahalin na sa Estados Unidos si Teves kag yara na sa Asya.
Sang Marso 9, nag-expire na ang travel order clearance ni Teves.
Nagpanawagan naman ang mga senador kag mga kongresista kay Teves nga magpauli na sa pungsod kag atubangon ang mga akusasyon nga ginahaboy batuk sa iya.
