ILOILO CITY – Posible nga magapangatubang pa sang mas mabug-at nga penalidad si Negros Oriental 3rd District Rep. Arnolfo Teves, Jr. kun padayon nga magpangatig-a sa pagbalik sa Pilipinas.
Kagab-i, gindagdagan sang Kamara sang 60 ka adlaw nga suspensyon sa boto nga 292-0 bangud sa padayon nga pag-absent apisar wala sang otorisado nga byahe sa luwas sang pungsod.
Bangud sini, wala sang ihatag nga sweldo ukon anuman nga benepisyo para sa iya.
Wala man sang kumpensasyon, office space, ukon anuman nga pribiliheyo nga ihatag kay Teves kaangay sa ginahatag sa iban nga mamalidha.
Sa interview sang Bombo Radyo kay Atty. Noel Palomado, Bombo Abogado, iya ginpahayag nga tubtob sa duha ka tuig ang suspension nga mahimo idagdag kay Teves kag ang pinakamabug-at amo ang expulsion ukon dalayon nga sipa-on na ini sa Kamara.
Pahayag dugang ni Palomado, mangin official ang suspension sa tion nga mabaton na ang suspension order.
Mahimo ini nga mapadala electronically, ukon i-serbe sa iya opisina sa Batasang Pambansa ukon sa iya puluy-an sa Negros Oriental bangud nga wala pa ini nakapauli sa Pilipinas.
Una na nga ginpahayag ni Department of Justice spokesperson Atty. Mico Clavano nga ipaidalom sa international lookout bulletin si Teves.
Posible suno sa natungdan nga sa subong, may yara na sang ideya ang otoridad kun sa diin na ang mamalidha kag may naga-monitor na.
Si Teves ang gin-link sa kamatayon ni Negros Oriental Governor Roel Degamo kag sa walo ka iban pa.
Mismo si Presidente Ferdinand Marcos, Jr. ang nagpanawagan na sa iya nga magpauli sa Pilipinas.
