ILOILO CITY – Nagpanawagan si House Deputy Minority Leader France Castro sa House of Representatives nga i-transfer sa Philippine Coast Guard ang ginaduso nga P500 million nga confidential and intelligence funds sang Office of the Vice President.
Sa isa ka statement, ginpahayag ni Castro nga tion na nga pasakaan ang intelligence funds sang Philippine Coast Guard agud nga maproteksyunan ang territorial waters sang pungsod.
Suno sa iya, indi dapat pagbalabagan sang Office of the Vice President ang amo nga realignment kag sa baylo, suportahan nalang bangud ini ang may kaangtanan sa national security.
Pahayag niya, ang nasambit nga ahensya ang masami nga naga-atubang sa pagpang-bully sang China apang ang intel funds ang yara lang sa P10 million humalin pa sang 2009 samtang ang opisina sang bise presidente ang may dako nga intel funds apisar nga wala sang labot sa intelligence gathering.
Sabat naman sang Office of the Vice President, ang confidential funds ang dapat nga itugyan nalang sa bilog nga myembro sang kongreso kag indi kay Castro.
Kabilugan nga P10.142 billion ang gin-allocate para sa confidential kag intelligence funds sa tanan nga ahensya sang gobyerno para sa masunod nga tuig.
Ini ang ginalakipan sang P500 million sa Office of the Vice President nga ginapamunuan ni Vice President Sara Duterte; kag dugang nga P150 million sa Department of Education kun sa diin, siya man ang nagapamuno bilang tiglikom.
Una na nga ginpahayag ni Castro nga ang allocation sa Department of Education ang ibutang nalang sa child care development.
Gindepensahan naman ni Duterte ang confidential funds nga iya ginapangayo para sa Department of Education.
Suno sa iya, may labot ini sa national security.
Ginpahayag naman sang spokesperson nga si Undersecretary Michael Poa nga ang P150 million ang gamiton para sa pagtipon sang impormasyon may kaangtanan sa recruitment nga nagakatabo sa academic institutions sa bilog nga pungsod.
