Tatlo gid ka mga salakyan ang gin-arado sang isa ka kotse sa R. Mapa St., Barangay Tabucan, Mandurriao, Iloilo City.
Ang kotse nga nakabunggo ang ginapahayag ginamaneho sang isa ka estudyante nga babaye.
Sa interview sang Bombo Radyo kay Police Senior Master Sergeant Alfredo Masamong, Jr., traffic investigator, iya ginpahayag nga sandig sa pahayag sang estudyante, natuyo ini kag nagutom kaina sang kaagahon bangud sa sobra nga pagtuon rason nga nag-guwa anay agud magbakal sang pagkaon.
Sang nagapauli na ini halin sa isa ka fast-food chain, napiyungan ini kag ginlikawan ang isa ka ginasundan nga tricycle.
Agud nga malikawan nga mabungguan ang tricycle, ginwarik sini ang salakyan pa-wala, rason nga nabungguan naman ang duha ka tricyle kag isa pa gid kotse.
Nasamaran man ang dingding sang isa ka sari-sari store.
Wala man sang persona nga nasamaran sa insidente kag safe man ang driver sang salakyan.
Ginapahayag nagsugtanay man ang driver kag ang tag-iya sang nahalitan nga mga salakyan nga bayaran na lang ang balor sang damage.
Gin-athag sang pulis nga indi hubog ang driver.
