ILOILO CITY – Napasaka na ang sampaw-sampaw nga kaso batuk sa mga suspek sa likod sang assassination kay Negros Oriental Former Governor Roel Degamo.
Ang mga suspek nga arestado amo sanday Joric Labrador, 50, anay soldado kag residente sang Cagayan de Oro; Joven Aber, 42, anay Army Ranger, residente sang Barangay Robles, La Castellana, Negros Occidental; Benjie Rodriguez, 45, residente sang Mindanao; kag Osmundo Rivero, isa man anay ka soldado halin sa Zamboanga City nga nangin taxi driver.
Suno kay Special Investigation Task Group- Degamo spokesperson Pol.Lt. Col. Gerard Pelare, ang mga suspek ang nagapangatubang sang kaso nga multiple murder, multiple frustrated murder, kag illegal possession of firearms and explosives.
Ang una nga duha ka mga kaso ang gin-file sa Provincial Prosecutor’s Office sa Dumaguete City samtang ang duha ang ginpasaka sa Bayawan City Prosecutor’s Office.
Apisar nga napasaka na ang kaso, nagapadayon sa gihapon ang hot pursuit operations sa iban nga wala pa nadakpan.
Sa subong, apat ang yara sa custody sang pulis kag may isa nga napatay bangud ginapahayag nagbato sa otoridad.
Ginpahayag sang Department of Justice nga ang duha sa tatlo ka mga suspek ang mahimo nga ipaidalom sa witness protection program.
Ginpahayag naman ni Philippine National Police chief Police General Rodolfo Azurin Jr. nga nakakuha na sang impormasyon ang mga otoridad nga makatudlo sa identity sang mastermind sa likod sang pagpatay kay Degamo kag sa walo ka iban pa.
