ILOILO CITY – Suportado ni Senator Francis Tolentino ang temporaryo nga pagbaton sang refugees nagikan sa Afghanistan nga ginpangabay sang United States government.
Suno kay Tolentino, wala sang problema kun magbaton sang pangayaw sa sulod sang tatlo ka bulan kag para sa humanitarian reasons.
Pahayag niya, posible nga nakibot lamang ang publiko sa proseso nga ginplastar sang Foreign Affairs Secretary kag sang Ambassador.
Dapat suno sa iya, ipahibalo anay sa publiko kag ipaathag nga ini ang temporayo lamang kag indi dululungan ang pag-abot sang 50, 000 ka mga refugees, kag labaw sa tanan, wala sang gastuhon ang pungsod.
Ginklaro ni Tolentino nga ang pagpabor niya sa amo nga tikang ang bangud sang humanitarian considerations kag indi bangud nga ginhingyo ini sang gobyerno sang Estados Unidos.
Paathag sang natungdan, madamo naman sang may ginbaton nga international communities ang pungsod kag wala sang problema kun patiniron ang mga ini sa sulod sang tatlo ka bulan.
Sa kaso sang mga Afghan, ang pag-akomodar sa ila sa pungsod ang makabulig man agud nga makalikaw sila sa political persecution kag pagpang-abuso sang Taliban.
Apang, ginpahayag niya nga si President Ferdinand “Bongbong” Marcos Jr. man sa gihapon ang may pinal nga desisyon sa amo nga butang.
Kung madumduman, ginpahayag ni Senator Imee Marcos nga ang pagbaton sang hingyo sang Estados Unidos ang may yara sang dako nga risgo sa national security kag public safety.
Ginkwestiyon man sini ang tuyo nga pagtago sang amo nga request.
Hugot naman ang panindugan ni Philippine Ambassador to the United States Jose Manuel Romualdez nga wala sang sekreto sa amo nga request kag ang proposal ang maid-id nga gintun-an.
