Magapatigayon ang Senate Committee on Health sang hearing sa Lunes agud mausisa kun ano na ang tikang sang gobyerno batok sa monkeypox virus kag sa nagapadayon nga COVID-19 pandemic.
Suno sa panel chair nga si Senator Bong Go, luyag mabatian sang senado kun ano na ang plano sang Department of Health (DOH) ilabi na bangud may isa na ka kumpirmado nga kaso sang monkeypox sa Pilipinas.
Magluwas diri, hibaluon man kun diin na kutob ang DOH sa vaccination efforts batok sa COVID-19.
Istoryahan man ang nagkala-expire nga mga bakuna.
Sandig sa DOH COVID-19 tracker, may 3.81 million COVID-19 cases ang Pilipinas as of Aug. 10, kag 36,035 diri ang active cases.
Wala pa sang tiglikom ang DOH bangud nagapungko lang bilang officer-in-charge si Undersecretary Maria Rosario Vergeire nga gin-appoint ni President Ferdinand Marcos Jr.
MONKEYPOX VACCINES SA 2023?
Sa pihak nga bahin, ginpahayag naman ni Vergeire nga may istoryahanay na subong kaupod ang Association of Southeast Asian Nations (Asean) kag ang iban nga pribado nga sektor agud makabakal sang monkeypox vaccines.
Posible suno sa OIC nga sa 2023 ini mabaton sang Pilipinas.
Ginpaathag man ni Vergeire nga posible mainfect sang monkeypox ang tanan kag indi lang ang myembro sang LGBT community. ##
