ILOILO CITY – Ginduso ni Senate Minority Leader Aquilino “Koko” Pimentel III sa Senado nga imbestigaran ang pagbakal sang Department of Budget and Management-Procurement Service (PS-DBM) sang P2.4 billion nga balor sang laptop nga gintawag sang Commission on Audit nga overpriced kag outdated.
Nag-file sang resolution si Pimentel nga nagapanawagan sang Senate Blue Ribbon Committee nga magpatigayon sang inquiry, in aid of legislation angut sa procurement sang laptops.
Tinutuyo sang imbestigasyon nga tumuron ang accountability kag islan ang layi kag proseso sa procurement kun kinahanglan.
Nagpabutyag man sang pareho nga plano si Sen. Risa Hontiveros.
Wala pa nakahatag sang sabat si Senate Blue Ribbon Committee Chairman Francis Tolentino angut sa amo nga panawagan.
Una na nga ginpahayag sang Department of Education (DEPED) nga bukas sila sa congressional inquiries angut sa pagbakal sang mga laptop.
Sang Myerkules, ginpahayag ni DEPED Spokesperson Atty. Michael Poa nga iga-evaluate sang ahensya ang claims nga mahinay ang laptop.
Sa tion nga mapamatud-an nga mahinay ang laptop, ang DEPED ang maga-invoke sang warranty provision kag hingyuon ang supplier nga kay-uhon kag islan ang mga ini.
Nagpangayo man ang DEPED sang documentation sang procurement nagikan sa PS-DBM.
