ILOILO CITY – Ginbuyagyag ni Senate President Juan Miguel Zubiri nga nagdangat sa tubtob P600 million ang kickback nga makuha sa pag-import sang kalamay sa pungsod.
Sa privilege speech ni Zubiri, ginpahayag niya nga suno sa iya sources, ang mga otoridad ang nagapangayo sang “tongpats” ukon suhol nga P50 tubtob P100 sa tagsa ka bag sang imported sugar.
Ang 300,000 metric tons sang kalamay ang nagdangat sa anum ka milyon sang bag gani ang kickback ang magadangat sa P300 million kun ang isa ka bag ang may patong nga P50 samtang P600 million naman kun ang patong sa isa ka bag ang nagdangat sa P100.
Ginsuhestiyon sang senador nga kun mahimo nga lainon ang systema sang importation.
Ginpamangkot man niya kun bala nagahimo gid lamang sang “artificial shortage” ang Sugar Regulatory Administration (SRA) kag gusto nila nga magpadayon sang importation apisar nga may yara pa sang stock nga wala napagwa.
Liwat man niya nga ginpanawagan sa mga opisyal sang SRA nga may kahilabtanan sa “illegal sugar order” nga mag-resign.
Kahapon, nagpanaog na sa pwesto si SRA Board member Atty. Roland Beltran samtang, si Agriculture Undersecretary Leocadio Sebastian ang nag-resign na sang nagligad nga semana.
Ginduso man niya sa Senate blue ribbon committee nga imbestigaran ang nasambit nga butang.
Pagkatapos sang diskusyon, gin-refer sa Committee on Accountability of Public Officers and Investigations ukon sa Blue Ribbon Committee kag sa Committe on Agriculture ang privilege speech ni Zubiri.
