ILOILO CITY- Ginkakibot ni Senator Imee Marcos nga P250 million ang ginakinahanglan nga pondo para sa pagpakay-o sang bag-o apang depektibo nga Ungka flyover.
Sa interview sang Bombo Radyo kay Sen. Marcos, iya ginpahayag nga kuntani mapangitaan sang paagi agud mapanubuan ang ipain nga kwarta agud gastuhan ang rehabilitasyon sang P680 million nga balor sang proyekto.
Suno sa senador, kinahanglan gid nga may manabat kun ngaa natabo ang amo nga problema sa flyover.
Una na nga nagpasalig ang presidential sister nga suportahan sini ang resolution nga ginpasar sang Sangguniang Bayan of Pavia, Iloilo nga naghingyo sa Senado sang investigation in aid of legislation kaangot sa istruktura.
Nahibaluan nga nagpadulong si Marcos sa Iloilo para sa blessing kag inauguration ceremony sang Asia Pacific Medical Center-Iloilo kun sa diin yara man si Sen. Cynthia Villar.
