ILOILO CITY – Gin-isa-isa ni Senator Pia Cayetano ang mga negatibo nga epekto sang pagtapos na sang calamity status sang pungsod bangud sang Coronavirus Disease 2019 pandemic.
Ginkwestiyon man sini ang indi pagpalawig sang amo nga status.
Suno kay Cayetano, may yara sang mga importante nga probisyon sa idalom sang layi nga yara sa deklarasyon sang state of calamity kag public health emergency nagikan sa presidente sang Pilipinas.
Gindugang pa sang senadora nga ginpahayag man sang Department of Health nga kun wala sang extension, maka-apekto ini sa pagpatuman sang nagkalain-lain nga Coronavirus Disease 2019 response strategies sang gobyerno.
Nahibaluan nga makapila ka beses nga gin-request sang Department of Health kay President Ferdinand Marcos, Jr. nga palawigon ang deklarasyon kag nagpaandam nga madula ang nagkalain-lain nga response strategies nga ginapatuman sa subong.
Lakip diri ang pag-inoculate sang mga bakuna, ang validity sang emergency use authorization sang mga bulong sa Coronavirus Disease 2019 kag ang emergency hiring kag allowance sang mga healthcare workers.
