Siyam ang pilason matapos nga nagbaliskad ang de-pampasahero nga jeep sa Barangay Cagay, Leon, Iloilo.
Sa interview sang Bombo Radyo kay Police Lieutenant Mark Cortez, Deputy Chief of Police sang Leon Municipal Police Station, iya ginpahayag nga siyam ang tanan nga sakay sang amo nga jeep lakip ang driver sang nagluntad ang insidente.
Suno kay Cortez kag santo sa pahayag sang driver sang jeep, pag-abot sang jeep sa nasambit nga lugar, nagpondo ini sa dulhogon nga parte sang dalan agud mag-unload sang karga.
Gintuad man sini nga sa amo nga tion ginkalsuhan sang konduktor ang jeep apang wala na nagkagat ang preno sini rason nga nadulaan sang control ang driver kag nagbaliskad ini.
Gilayon naman nga gindala sa Western Visayas Medical Center kag Aleosan District Hospital ang mga biktima.
