Isa sa mga ginapatuman nga pamaagi sang 3rd Infantry Division (3ID), Philippine Army agud ma-monitor ang kahimtangan sang ila mga kasuldadohan amo ang ginatawag nga “Squad Notes.”
Ang “Squad Notes” amo ang isa ka journal kun sa diin ginapasulat ang kada suldado sang ila mga ginabatyag, ukon personal nga problema ilabi na sa ila man nga kaupod nga mga soldado.
Sa interview sang Bombo Radyo kay Captain Jessie Jun Ebalan, Chief sang Division Public Affairs Office sang 3ID, ginpahayag sini nga ginalantaw kag ginabasa sang mga senior Non-Commissioned Officers (NCO) ang nasambit nga mga journal agud ma-monitor ang ila kahimtangan, lakip na ang ila mental, emosyonal kag panglawas nga estado.
Paagi man sini, mahibaluan kun may yara sang indi pag-intindihanay ukon hiligut-anon sa tunga sang mga suldado agud nga masolbar ini gilayon.
Suno kay Capt. Ebalan, ginapatawag gilayon kag ginapaidalum sa counselling ang mga suldado kun mahibaluan nga may ginabatyag ukon may problema agud mahatagan sang nagakaigo nga bulig kag suporta.
Base sa man sa squad notes, ginakabig sang 3rd ID, PA nga isolated case ang natabo nga insidente sang Pebrero 9, 2026, bangud wala man sang nakita nga lainay sang buot sa duha ka involved nga mga indibidwal kun sa diin aksidente nga natiruhan sang isa ka suldado ang iya kaupod nga gintunaan sang kamatayon sini.
Ginapasiguro sang dibisyon nga indi na ini maliwat kag himuon ang tanan nga tikang agud malikawan ang kaangay nga insidente.
, Philippine Army agud ma-monitor ang kahimtangan sang ila mga kasuldadohan amo ang ginatawag nga “Squad Notes.”){kind=link}