Nagsungka na ang suspek nga naghatok-hatok buno sa stepfather sang iya live-in partner sa Brgy. Sto. Niño, San Miguel, Iloilo.
Ini amo si alias Ian, 34-anyos, tumandok sang Daet, Camarines Norte.
Sa interview sang Bombo Radyo kay Police Captain Bryan Alejo, hepe sang San Miguel Municipal Police Station, ginpahayag sini nga nag-surrender ang suspek bangod sang pagpang-enganyo sang iya tiyo nga atubangon ang ginhimo nga krimen.
Matandaan nga ginbuno sang 21 ka beses sang suspek ang 47-anyos nga biktima samtang nagakatulog ini sa ila balay sa Brgy. Sto. Niño, San Miguel sang Septyembre 10.
Antes ang krimen, ginpahayag nga naka-inom-inom pa sila apang nagluntad ang kumprontasyon kag nag-inaway.
Nagpuli ang suspek kag sang kaagahon, ginbalikan sini ang biktima kag ginpatay.
SOBRA NGA KAAKIG?
Ginalantaw naman nga nagsupot gid ang kaakig sang suspek sa biktima bangud masami ini nga ginapabati-batian.
Suno sa mismo live-in partner nga si alias Ann, kun mahubog ang iya nga stepfather, kontra gid sini si alias Ian kag indi ini boto sa ila nga relasyon. Nagapati man si alias Ann nga ginsapote anay ang iya live-in partner rason nga nagbalos lang ini.
Sandig sa pulis, murder ang ipasaka nga kaso bangud ginaalegar nga planado ang krimen kag nagakatulog pa ang biktima sang ginsakyan ini kag ginbuno. #
