Arestado sa Clark, Pampanga ang isa pa ka suspek nga may kahilabtanan sa kaso nga qualified trafficking in persons batok kay anay Presidential Spokesperson Atty. Harry Roque kag Cassandra Ong.
Ginkilala ang nadakpan nga suspek nga si “Mariano,” isa sa 49 nga co-accused ni Roque kag Ong sa human trafficking case nga nagluntad sa Lucky South 99 Outsourcing Inc., isa ka Philippine Offshore Gaming Operator (POGO) nga nahamtang sa Porac, Pampanga.
Suno sa Criminal Investigation and Detection Group (CIDG), si Mariano isa sa mga security guard nga naka-duty sang natabu ang insidente.
Ginpaandaman ni CIDG Director Police Major General Nicolas Torre III ang iban pa nga co-accused nga mag-surrender na antes pa man sila madakpan, bangud padayon ang law enforcement operations sa pagpangita sa mga ginapangita nga personalidad.
Matandaan nga gin-isyu sang Regional Trial Court sang Angeles City sang Mayo 15, 2024 ang mga arrest warrant batok kanday Roque, Ong, kag sa iban pa nga ginatudlo nga mga katapo sa krimen.
Sang Mayo 22, una na nga nadakpan si “Marlon,” isa man sa mga co-accused, sa entrapment operation sa Mabalacat City, Pampanga.
Sa pihak sini, ginpanginwala ni Atty. Harry Roque ang mga alegasyon nga wala siya sang ano man nga koneksyon sa illegal nga POGO kag indi man siya abogado sang Lucky South 99.
Sa subong, padayon sagihapon nga nagatenir si Roque sa Netherlands kag nagapangayo man ini sang asylum amo nga pungsod.
