ILOILO CITY – Ginpa-idalom na sa immigration lookout bulletin sang Department of Justice sanday suspended Bureau of Corrections chief Gerald Bantag kag ang iya anay deputy nga si Ricardo Zulueta.
Ang Immigration Lookout Bulletin Order ang nagabutang kay “Gerald Quitaleg Bantag” kag “Ricardo Soriano Zulueta” bilang subject sang watch order may kaangtanan sa murder complaints nga ila ginapangatubang sa Department of Justice matapos ang kamatayon sang broadcaster nga si Percival “Percy Lapid” Mabasa kag ang gina-alegar nga middleman nga si Jun Villamor y Globa ukon Cristito Villamor Palaña.
Ang duha ang gintumod sang otoridad nga mastermind sa kamatayon sang duha bangud sa naakig si Bantag sa komentaryo ni Lapid samtang si Villamor ang ginpatay agud nga mahinabunan ang kamatayon ni Lapid.
Suno sa order, bangud sang kabug-aton sang offense nga gin-charge sa criminal complaints, dako ang posibilidad nga ang mga ini ang malagyo sa layi pinaagi sa pagbiya sa pungsod.
Ang order ang pirmado ni Justice Secretary Jesus Crispin “Boying” Remulla base sa request nanday National Bureau of Investigation National Capital Region Acting Regional Director Rommel Vallejo kag National Capital Region Police Office chief Police Brigadier General Jonnel Estomo.
Ginklaro sa amo nga order nga ini ang may katuyu-an lamang nga i-monitor ang duha kag wala ginadumilian nga maggwa sa pungsod.
Una na nga ginpahayag ni Remulla nga indi na kinahanglan ang immigration lookout bulletin order bangud nga ang mga government officials ang kinahanglan nga magpresentar sang travel authority antes pahanugutan nga magbiya sa Pilipinas.
Indi pa klaro kun ngaa nga nagbag-o ang panan-awan ni Remulla.
