ILOILO CITY – Posible nga magapauli na bwas nga adlaw, Mayo 17, si suspended Negros Oriental Representative Arnie Teves Jr.
Ini ang ginpahayag ni Justice Secretary Jesus Crispin Remulla base sa iya nga reliable source.
Suno kay Remulla, indi pa klaro kun sa diin magahalin si Teves apang posible nga nagikan ini sa Timor Leste kun sa diin, ginbasura ang iya hingyo nga political asylum.
Dugang pa niya, tuman na ka limitado sang hulag ni Teves bangud sang Interpol notice.
Si Teves nga amo ang nagagwa nga “main mastermind” sa likod sang pagpatay kay Negros Oriental Governor Roel Degamo kag sa siyam ka iban pa ang nagpamalibad nga magbalik sa pungsod bangud sa kalabaka sa seguridad.
Pahayag ni Remulla, naka-alerto ang Philippine National Police agud nga maghatag sang seguridad sa mamalidha sa iya pag-abot sa pungsod.
Gin-abi-abi naman ni Remulla ang posible nga pagpauli ni Teves nga makabulig agud nga magpadayon ang kaso batuk sa kongresista.
Na-atrasar ang pagpasaka sang kaso batuk kay Teves bangud nagpamalibad nga magkooperar ang anum tubtob pito ka mga suspek nga ginakabig man nga mga witnesses.
