ILOILO – Ginakuwestiyon sang munisipalisad sang Sibalom, Antique ang nangin resulta sang koronasyon sang Lin-ay kang Antique nga kabahin sang pagsaulog nila sang Binirayan Festival.
Sa interview sang Bombo Radyo kay Sibalom Vice Mayor Zoilo Bernardo Tubianosa, iya ginpahayag nga sala ang nangin tabulation sang committee sang Lin-ay kang Antique gani sala man ang ginkoronahan nga kandidata nga amo ang tiglawas sang San Jose.
Nahibaluan nga 18 ka mga kandidata nga nagikan sa nagkalain-lain nga munisipalidad sang Antique ang nagpasakop sa nasambit nga pageant.
Sa 18 ka mga kandidata, lima lang ang ginpili nga makasulod sa coronation night kag ini amo ang San Jose, Sibalom, Belison, Valderama kag San Remegio.
Suno kay Tubianosa, ginakuwestiyon nila ang nangin proseso sang pagtabulate sang committee bangud klaro nga wala naggwa ang collective nga desisyon sang anom ka mga judges.
Dugang sang natungdan, base sa ginhatag nga score sang mga hurado, klaro nga si Ms Sibalom ang nagdaog kag nagakadapat koronahan nga Lin-ay kag Antique apang sa baylo ang tiglawas sang San Jose ang gindeklarar nga tagdaog nga sa pagkamtuod suno kay Tubianosa amo ang pinaka ulihin kun score ang pagabasehan.
Suno naman kay Atty. Eduardo Fortaleza, nakapasa na sang resolusyon ang Sanguniang Bayan sang Sibalom nga nagapangayo sang kopya sang resulta sang desisyon sang mga hurado lakip man ang tabulation sang scores.
Lakip man ang ila final protest nga may katuyuan nga ma deklarar ang matuod nga nagdaog base sa nangin desisyon sang mga hurado kag makoronahan ang matuod nga nagdaog.
Samtang nanindugan naman ang committee sang Lin-ay kang Antique paagi sa ginpagwa nila nga opisyal nga pahayag nga gina sunod lang nila ang rules kag mechanics sang committee.
Ginpanginwala man nila nga may yara sang kapaslawan sa pagtabulate sang mga scores sang mga kandidata kag sila lang mismo ang may katungdanan nga mag desisyon kun ano ang mangin proseso sang tabulation.
