ILOILO CITY – Temporaryo nga ginkansela ang biyahe sang pump boat nga may ruta Iloilo-Guimaras vice versa bangud sa pabag-o bag-o nga lakat sang tiyempo subong nga adlaw.
Gilayon man nga ginbalik ang biyahe sang nag-untat ang pagpanalithi kag nag-init.
May kaangtanan diri, ginpahayag ni Liberty Calunsod, vendor sa Ortiz wharf, nga may yara sang negatibo nga epekto ang hinali nga pagkansela sang biyahe sang pump boat.
Suno kay Calunsod, ang iban sa mga pasahero ang nagaderetso na lang sa fastcraft terminal agud nga sigurado nga makapauli sa Guimaras.
Ginpahayag ni Calunsod nga bangud 6:00 AM – 6:00 PM ang biyahe sang pump boat, limitado lang ang mga pasahero nga nagadungka sa pantalan kag kun kaisa, wala na sang biyahe bisan wala pa ang 6:00 sa kasisidmon.
Sang nakaligad nga holiday season, ginpahayag sang natungdan nga wala naubos ang ila baligya bangud sa nasambit nga rason.
