ILOILO CITY – Ginbasura sang Timor-Leste ang asylum request ni suspended Negros Oriental Representative Arnolfo Teves, Jr.
Suno sa Department of Foreign Affairs, naghatag ang Timor-Leste Government sang lima ka adlaw agud nga makagwa si Teves sa ila nga pungsod.
Apang, mahimo ini sa gihapon nga mag-file sang appeal may kaangtanan sa amo nga desisyon.
Si Teves ang nagsulod sa Timor-Leste sang nagligad nga semana kag nag-secure sang special asylum status suno kay Justice Secretary Jesus Crispin Remulla base sa impormasyon nagikan sa Department of Foreign Affairs kag sa Philippine Ambassador to Timor-Leste.
Gilayon man nga ginpabalo sang Department of Justice pinaagi sa Department of Foreign Affairs ang Timor-Leste nga si Teves ang isa ka person of interest sa murder cases kag ginakonsiderar nga kabigun nga isa ka terorista.
Si Teves ang gina-akusaran nga isa sa posible masterminds sa pagpatay kay Negros Oriental governor Roel Degamo kag sa siyam ka iban pa.
Ginpanginwala niya ang amo nga mga alegasyon kag suno sa iya, siya kag ang iya pamilya ang wala sang kahilabtanan sa krimen.
Nagpakatig-a sa gihapon si Teves nga magbalik sa pungsod bangud sa gina-alegar pamahog sa iya kabuhi.
