ILOILO CITY – Magasugod na ang Turkey sa pagpatindog sang mga balay matapos ang halos isa ka bulan nga linog nga nagbilin sang masobra sa 50, 000 nga mga casualties.
Suno sa report, masobra sa 160, 000 nga mga buildings nga naga-unod sang 520, 000 nga mga apartments ang nag-collapse ukon ginguba sang linog.
Samtang nagahilapit ang election, nagpasalig si President Tayyip Erdogan nga liwat nga magapatindog sang balay sa sulod sang isa ka tuig apisar ginpahayag sang mga eksperto nga unahon sang otoridad ang safety antes ang kadasigon.
Ang administrasyon ni Erdogan ang nag-angkun sang madamo nga kritisismo sa pagresponde sa hitabo kag ang indi pagpatuman sang construction quality control sa sulod na sang pila ka tuig.
Ang plano sang Turkish government amo nga magtukod sang 200,000 nga mga apartments kag 70,000 village houses nga magabalor sang ginabanta $15 billion ukon P 828 billion.
Apang base sa estimate sang US bank nga JPMorgan, ang pagpatindog sang panimalay kag imprastraktura ang magadangat sa $25 billion ukon P1.37 trillion.
Suno naman sa United Nations Development Programme, 1.5 million ka mga tawo ang nawad-an sang balay samtang 500,000 nga mga balay ang kinahanglanon.
