ILOILO CITY – Nagpakigkita si Ukrainian President Volodymyr Zelenskyy kay Pope Francis sa Vatican City.
Suno kay Zelenskyy, isa ka dako nga dungog para sa iya nga makita ang santo papa nga una na nga nagtanyag sang bulig para nga ma-untat na ang kinagamo nga ginlunsyar sang Russia sa Ukraine, isa ka tuig ang nakaligad.
Naglawig sang 40 minutos ang pag-istoryahanay ni Pope Francis kag sang Ukranian leader.
Sa ginpagwa nga statement, ginpahayag sang Vatican nga ang duha ang nag-istoryahanay may kaangtanan sa humanitarian kag political situation sang Ukraine nga nabutang sa alang-alang bangud sang kinagamo.
Sang nagligad nga bulan, nagpakigkita man ang prime minister nga si Denys Shmyhal kay Pope Francis sa Vatican kag nagpangayo sang bulig para sa Ukraine nga mapapauli ang mga kabataan nga iligal nga gindala sa Russia sa tion sang invasion.
Antes ang meeting kay Pope Francis, nagpakigkita man si Zelenskyy sa Italian officials.
Nakabaton ini sang bulig nagikan nga open-ended military kag financial support kag mas mabaskog nga suporta para sa Ukraine sa handum sini nga maka-upod sa European Union.
