ILOILO CITY – Nagpangayo ang Ukraine sang bastante nga air defence capabilities sa ginpatigayon nga emergency meeting sang Group of Seven countries.
Ini agud nga matapna ang Russia sa sunud-sunod nga missile attack nga may kahimuan sang Moscow kag nagresulta sa madamo nga casualties.
Sa amo nga emergency meeting, nagpasalig ang G7 nga magapadayon ang “financial, humanitarian, military, diplomatic kag legal support” para sa Ukraine.
Nagpaandam si Japan Prime Minister Fumio Kishida nga ang pamahog sang nuclear weapon ang dapat nga indi pagpabay-an.
Sa joint statement nga ginpagwa matapos ang pagtililipon, nagpasalig ang mga lideres nga panindugan ang Ukraine tubtob sa ulihi.
Nagpasalig man sila nga magapanabat si Russian President Vladimir Putin kag ang iban pa nga mga responsable.
Suportado man sang grupo ang kampanya sang Ukraine nga bawion ang mga rehiyon nga gin-agaw sang Russia.
Apang, wala sang klaro nga sabat sa request ni Ukrainian President Volodymyr Zelenskyy nga dugang nga air defence.
