Nagpanawagan ang United Nations Human Rights Committee sa gobyerno sang Pilipinas nga amo ang largest Catholic country sa Asya nga i-decriminalize ang abortion kag himuon nga legal ang divorce.
Sa 136th session sang amo nga committee, ginpahayag sang panel nga kun krimen ang aborsyon sa pungsod, gina-sekreto na lamang sang mga babayi ang pag-avail sang abortion services nga amo ang nagabutang sa ila kag sa ila nga ikaayong lawas sa peligro.
Ini bangud sa Pilipinas, ginadumilian kag ginasilutan sang pagka-preso ang mga tawo nga naga-practice sang abortion.
Suno naman sa United Nations Human Rights Committee, kun i-decrimanize ang abortion, magarantiya nga may yara sang “safe, legal, kag effective access to abortion” kun nabutang sa risgo ang kabuhi sang nagabusong nga babayi.
Ginpahayag nga para man ini sa mga babayi nga naga-antos bangud sa ila nga pagbusong, kag ilabi na para sa mga babayi nga nagbusong bangud sa rape ukon incest.
Nag-rekomendar man ang committee sa national government nga pabaskugon ang sexual kag reproduction healthcare services lakip na ang post-abortion care.
Kinahanglanon man suno sa committee ang implementasyon sang comprehensive sexual education agud malikawan ang mga unwanted ukon ang wala ginagusto nga mga pagbusong sang kababainhan.
Kun basehan ang rekord sang Philippine Safe Abortion Advocacy Network, may yara sang 1.26 million women sa pungsod nga nagpa-abort sang 2020 kag lakip sa sini amo ang mga pigado, rape victims, kag 25 anyos panubo ang pang-edaron.
Dugang nga rekomendasyon sang United Nations body amo ang paghimo sa divorce bilang legal sa pungsod agud nga maprotektahan ang mga babayi gikan sa domestic violence.
Nahibaluan nga magluwas sa Vatican City, ang Pilipinas lamang ang naga-isahanon nga pungsod sa kalibutan kun sa diin ginakabig nga iligal ang divorce.
Kun kinahanglan nga magpa-annul sang kasal, nagalawig sang apat ka tuig ang proseso sa Pilipinas.
Sang 18th congress, gin-aprubahan sa Kamara sa final reading ang Absolute Divorce Bill apang wala napasar sa Senado ang kaangay nga hagna. ##
