ILOILO CITY – Nagpaandam si United States Presidents Joe Biden sa mga gas kag oil executives nga indi paggamiton ang bagyo nga rason agud nga magpataas sang presyo.
Ini ang ginpahayag sang presidente sa iya speech sa Federal Emergency Management Agency headquarters sa Washington, D.C. kadungan sang paglaslas sang tropical storm Ian sa Florida.
Ginabanta sang administrasyon nga maapektuhan sang tropical storm ang suplay sang 160,000 barrels sang petrolyo sa tagsa ka adlaw nga nagarepresentar sang 2% sang daily production sang pungsod.
Suno pa sa iya, nagabantay ang America kag dapat nga himuon sang nasambit nga industriya ang nagaka-igo nga butang.
Samtang, ang tropical storm Ian ang posible nga makabig nga pinakamalala nga pinakamamatay nga bagyo sa history sang Florida.
Base sa inisyal nga data, nagdangat na sa lima ang nagkalamatay kag ginalauman nga magasaka pa.
Gindeklarar naman ni Florida Governor Ron DeSantis ang state of calamity bangud sa ginakabig niya nga “500-year flood event” .
Linibo ka mga tawo ang stranded sa bilog nga state kag 2.5 million ka mga tawo ang apektado sang blackout.
Ang tropical storm Ian ang una nga nagsulod sa state bilang isa ka category 4 hurricane apang gin-downgrade bilang tropical storm.
