ILOILO CITY – Magapadulong sa pungsod sa masunod nga semana si US Secretary of State Antony Blinken agud nga magbisita kag agud nga mapabaskog pa ang long-time alliance sang Washington sa Pilipinas.
Magapakigkita si Blinken kay President Ferdinand Marcos Jr. kag sa Philippine counterpart sini nga si Enrique Manalo sa Sabado, Agosto 6.
Ini ang pinakauna nga state visit ni Blinken sa pungsod bilang US Secretary of State.
Sa ginpagwa nga statement sang US Embassy, lakip sa pagahambalan sang duha ka bahin amo ang bilateral efforts agud nga mapabaskog pa ang US-Philippines alliance pinaagi sa pag-increase sang kooperasyon sa energy, trade kag investment, pag-advance sang shared democratic values kag pandemic recovery.
Nahibaluan nga may yara pa sang imbitasyon si US President Joe Biden kay Marcos nga magbisita sa Washington.
Ini ang pinakauna nga pagbisita sang isa ka US Secretary of State sa Pilipinas sa sulod sang tatlo ka tuig kun sa diin, nag ulihi nga nagkadto amo si Mike Pompeo sang February 2019.
Ang pagbisita ni Blinken sa pungsod ang matabo isa ka bulan pagkatapos sang meeting sang top diplomat sang China nga si Wang Yi kay Marcos kag sa pila pa ka senior Philippine officials.
Sang nagmarka ang ika-anum nga anibersaryo sang arbitration victory sang Pilipinas batuk sa China sang Hulyo 16, ginpromisa ni Blinken ang commitment sang America nga depensahan ang pungsod batuk sa ano man nga armed attack sa West Philippine Sea kag gin-reject ang panibag-o nga massive campaign sang China sa resource-rich waters.
Ang Pilipinas kag US ang may yara sang 70 ka tuig nga defense accord nga ginatawag nga Mutual Defense Treaty nga nagapabaskog sa Washington nga depensahan ang iya Asian ally nagikan sa pagpangginamo.
Apisar nga indi kabahin sang partido nga naga-dispute, ginpanindugan sang US nga ang West Philippine Sea nga isa ka major trade route, bukas kag accessible ang kabahin sang iya national interest.
Ang China ang mabaskog naman nga nagapamatuk sa bisan ano nga foreign intervention partikular na ang US.
Antes ang pagbisita ni Blinken sa Pilipinas, magapasakop siya sa US-ASEAN Ministerial Meeting, East Asia Summit Foreign Ministers’ Meeting, kag ASEAN Regional Forum sa Agosto 3-5.
Suno kay State Department spokesman Ned Price, Sa tagsa ka ministerial, ang Secretary ang maga-emphasize sang commitment sang US sa ASEAN centrality kag madinalag-on nga pagpatuman sang ASEAN Outlook sa Indo-Pacific.
Siya ang maga-address man sang COVID-19 pandemic, economic cooperation, ang away batuk sa climate change, ang krisis sa Burma, kag ang pagpang-atake sang Russia sa Ukraine.
Pagkatapos sa Manila, magapadulong naman sa Africa si Blinken kag mahapit sa South Africa, Democratic Republic of the Congo, kag Rwanda.
